Wär meint i chäm nid wieder, hetsech gschnittä
Bi wieder nidä numä chli weniger dichter!
I dr Regu passiert weni, weni numä chillä
Veränderig gits keni ussert stellari Biuder

Aber gopferteli, weni windä geit viles
Wöu niemer weiss wasi wirdä bringä
Vo schön u heiss bis zu dä wiudischtä Gwitter
Bi äuä ds Eis, unger dä verhasstischtä Findä

U glich hanis gschafft dasmi aui liebä
Ab 30 Grad hoffä au ufänä chauti brisä
Es isch Gas i dr Form woni transportierä
U dir chöit froh si chöiter mi inhalierä

Bi numä sones Teili i däm ganzä Gefüege
Niemer gseht mi, aber jedä chami füehlä
Ab u zuä beninimi mi haub so gmüetlech
Je nach Druck machi mi starch fürä Früehlig

Je nach däm lüchteni aubä so mystisch
U machä dr Wäut ihrä Abä so gmüetlech
Je nach dichti, u wi ds Wasser so mitspiut
Bricheni ds Liecht imänä angerä Winku

Aber benämet nid aus hätteter d’ Erlüchtig
Ds ganzä isch vilech numä ä optischi tüschig
D Wahrheit verbigtsech oft hingerem Würfu
Aber schonä Blick i Spiegu würd sicher nützä

Ärdä, bis froh bini sones Luftgmisch
Wo so viu schrott eifach verpufft dinn
Ohni Atom kes Ozon i dr Luftschicht
Ke Schutz vorem Tod so winä Schutzschiud

O we dini Bewohner mängisch no klug si
Di Fucker faklä aues ab wo nidso guet isch
Numä Was nid brönnt landet im Fluss
U nid vergässä, es het o Wasser ir Luft

Wär nid lehrt muess füehlä wis geit
Nutzä d Gunscht vo dr Sunnä, wirdä gemein
Wart numä - uf mini Brüeder chaut u Heiss
Wemer us ribä wärdemer gwautsam u leid

Wini scho us dr Sicht vom Wasser ha gseit
Chöiter froh si dasi nid aus bestrafä wo geit
Aber weni gseh dasdr ke gränzä me gseht
Wirdi zu Gwaut u hittänech herter denn je

Wirblinech nidä, brächenech wirblä u glider
U Brätschä eui Gsichter nidä bis dr ersticket
Auso machet nech idsä Gedankä bim Grillä
Und überleget gschider was dr id Flammänä schicket

Nei, ds Klima erwermt sech nid von allei
Aber hei machet doch eifach was dr weit
U häbet fröid das d’Ärdä d Sunnä umkreist
Bi numä ds Gfäss wo Dräck i dr Sphärä verteilt